न्ह्यावने त्वतुपिं

                                                                    राम शरण महर्जन

भौचां लँ त्वाःथले वं

न्ह्यावने वने त्वतिपिं

वनागु लँय् लुफीं हायेवं

लिफःतिनातुं लिहां वनीपिं

दुगु गुथी हे त्वाःत्वा थलानं

छप्पं छधीया म्यें हाले मगापिं

च्वनागु छेँ त्वता डेराय् च्वनानं

राज्यया म्हगस म्हंका च्वंपिं

नेपाल संबतया जात्रा न्यायेकानं

लिपी व भाषा न्हिज्याय् छ्यले म्वाःपिं

लाज्याः व नखःति धेधेचुलानं

संस्कृति व जातिया न्हाय् च्वछाये योपिं

पिनेयापिन्त छेँ बुँ मीःयानं

भुमीपुत्रया घुर्की क्यने मगापिं

म्हुतुजक न्यायेका नेवा दर्शनया

मेपिगु भिं स्वया ईखयायां चितासू मदुपि+

९ पोहेलाथ्व ११३८

हिलावंगु संस्कार

        काय्म्हसित ईलय् ब्याः याना बिल । न्हूम्हः भमचां छेँ याना च्वन । भौमचा नेवा खयांनं मांभाय् ल्हाये म्वाम्हः । त्यारारां खय् भाय् ल्हाना च्वन– छेँ सकसियालिसें । अय्नं सुयातं छुँ मपाः । छाय्कि भौमचा थः मचां ययेका हम्हः । मां अबु थः काय्नं खुसुक्क मिंकी धन्दा । उकिं मसःमसः खय् भाय् ल्हाना च्वन । 
“आमा, खाना खान आउँनुस् ।”  
“.......।”  

       म्ह्याय्यातनंं वं हे ययेका तम्हःसियालिसें ब्याःयाना बिल । ययेकातलंनं छम्हः खय् मचा । थः म्ह्याय्यात सतवंसां, छेँ वसां मां भासं खँ ल्हाये दु, उकिं उमी ख्वाः चक्कं । छाय्कि म्ह्याय्नं थः नेवा मचाजुया जन्म जुयागुया धर्म हना च्वन । 
“यो मां, ज्यना या झासं ।” 
“वयाच्वना का...।”

    भौमचा आधुनिकताय् लालकया च्वन । म्ह्याय्मचा भविष्यतकं स्वया म्वाना च्वन ।

राम शरण महर्जन           
६ पोहेलाथ्व ११३८

छगू कासा

“दुख नं छगू कासा हे खत 

गुलि लय्ताय् फत– थः थःम्हं

 उलि हे ह्याईपुसे च्वनिगु–

मनं मकातले दुख जुल धका” 

जीवन म्वायेगु झ्वलय् ।

१३ थल्लिागा ११३८

ल्हाःचि खः दसू

मृत्यु लिछ्याना

सर्वय् छन्त लल्हाना

ल्हाःचि खः दसू

गुँच्वया जि निभाः

छेँ,छेँजःया भिंतुना ।

बिलीबिलीं जाः

मनय् ह्वगु स्वांखं थाैं

गथुंला स्यू थें

स्वांमाः गथे हनेमा

हलिं गथे न्यंकेमा ।

५ थिंल्लागा ११३८

थुलि छाय् थें ग्यागु

–राम शरण महर्जन 

                                                                     कीपू ।

थः खना हे थः मस्यू थुलि छाय् थें ग्यागु

मेपिन्त लाःगु घाःलं छत्तिं गथे मस्यागु ।

फसं जक दासां भ्वखाय् दंथें थःत जू हँ

ब्वाय् स्वयेगु, हिस्यायेगु मेपिन्त जुसा हँ ।

घाःलं जुलं स्याःचाया सवाः काईम्हः जुल

ख्वबिया जःलय् मखुथें थः ख्वाः स्वैम्हः जुल ।

मनं मनू सुंनं थन याउँक नुगः दिकेत

म्हगस म्हंथें मिखां तनिगु मदु स्वयेत ।

१० कछलागा ११३८

छं थाय् तक

जि वयागु लं खः छं थाय् तक हे

हिलाहिला लं त्वाथला वया छंगु लय् हे । 

धासां धाल का मेपिंसं न्ह्यागु हे धा

छंगु मतिनांया किचलं दाय्वं जित गा ।

मसियांनं मसिल थुलि हे जिं मसिल

मोहनीं काम्हथें जि गुलि कां जुल 

सु खः छु खः जि छुं छुं हे मसिल

 लुपिंm हासां स्या मचा जित छु जुल ?

१३ कछलाथ्व ११३८

छंगु न्हिलाःसू

सीना म्वाय् गुलि थाकु मिखां कुतुं वनेवं सिल
मगामचा धैगु छु खः जित थौं गनेवं सिल ।

ख्वबिया मू गुलि ग्यं धैगु छंगु न्हिलाःसूं थुल
मिखा तिसिना थः नालागु लुफिं हाय्वं चाल ।

धाय् मफुगु नुगः खं गुुलि तिगू जि हे जक स्यू
स्याचाया माकु सवाः ज्यायाना ल्हाः प्वंम्हं जक स्यू ।

थः धैपिं सु खः धैगु ख्वबि हुया बिइवं सिल
कतः धैपिं नं सु खः धैगु पलाः द्वनेवं सिल ।

ज्यंकु लिसें स्वगु स्वापूतिं कसाः धैगु छु खः सिल
त्यपूया ख्वाउँगु लासां ला लुसिया स्वापू सिल ।


१२ कछलाथ्व ११३८