थः हे थः मजू

                         
–राम शरण महर्जन
 कीपू ।

न्हू न्हूगु खंग्वः, खंभाय्नं
जीवनया हिसी च्वन्ह्याई
सासः मगमग नस्वाई
पाहाँयात द्यो भाःपिसें हनिपिं झी
गुलिग्यं झीपिं लना तल स्व
थःगु छेँ थः गु भाय् ल्हाये म्वापिं
च्वःकया कतः भाय् ल्हाना ज्वीपिं
कतःयात थः नाला भ्वाभः थः हे जूपिं
स्वनिगःया बाखं कंकं मिखा भुलं नपिं
पुर्खाया छेँ बुँ म्यूम्यूं थःहे बालं माःजूपिं
खै, भूमिपुत्र म्हिगः थ्व थाय्या
मेपिन्गु खं ल्हाल्हां थौं नुगः म्हूपिं
धुकु लःल्हाना उमित ल्हाः तुति चुलि ह्वपिं
स्वापू खः भाय् ला, छि–जि स्वाईगु
छिं स्वासां मस्वाः छित उमिसं
म्हिगः थ्वः थाय्या द्योसां छुयाय् ?
‘बाज्याबजेनं खय् भाय् मस्यू, मांअबुं खय् भाय् सिल,
काय्म्ह्याय्नं मां भाय् मसिल, छय्छूईपिंसं म्हंहे मसिल’
सःस्यूधापिं न्ह्यलुवाया ख्वाः ब्वयाःजूपिं
गनया न्ह्यलुवाः, सःस्यूधापिं, थौं थनया कतांमरी स्व
थः मस्तय्गु नां छुई, झीगु मखु
थः च्वनागु थाय्या नां काई, झीगु मखु
झीगु बस्ती, पुचःलय् च्वं वल मेपिं
नीगु भाय्या स्वापू चुलि जायेमागु, छु जुल, छाय् जुल                                          
खं ल्हासां बिपूः भाय्, च्वसां मेमेगु भाषाय्
झीगु भाय्, लिपी थःम्हं हे मछ्यसें तधंपिं
मेपिंगु ईखजक यायां थः हे तंपिं
म्हगस म्हंका माक्कुक द्यने न्ह्यांपिं
झी जुल स्व चितासू मदुपिं
जीवन ब्वनेत स्वःलिसें नुगः मछिना वई
थः बुगु थाय्, थःगु नां तकं थःगु मजुल
संस्कृति म्वाके मफुसा, जुई भाय् नं सुपाँचथें
पुर्खाया पलाःख्वाय् स्वस्वं, संस्कृतिया नस्वाः ह्वःह्वं
गर्वंजागु न्हूगु पलाः न्हूकथं च्वयेकेमाः थौं झीसं
न्हू पुस्तायात भूमीपुत्रया थःगु लँ ज्यायेमा झीसं
झीगु भाय् झीगु लिपि न्हिथंया ज्याखंय् छ्यलेमा
मिखांखंक्व, सासपतिकं नेवाः म्हसिका च्वनेमा
पलाःपतिकं हाकःगुँथें छ्यों धस्वाका जुयेमा
मेमेगु भाय्, लिपिनापं स्वांथें ह्वयेकेमा, नस्वाकेमा
खंजक सयेका ल्हाः प्वःचिना न्याःम्ह सि मस्यासा
बुलुइ, छाय् बुमलुइ झीगु भाय् छि दसां, जि दसां ।
२ ञलाथ्वः ११३७